قصص الأنبياء
#قصص_الأنبياء
موسى عليه السلام"٦"
بين_موسى وبني إسرائيل"١"
اتكلمنا المرة إللي فاتت عن هلاك فرعون ونجاة بني إسرائيل،
بعد هلاك فرعون وجنوده وأُمراؤه، لم يتبقَّ في مصر غير العامة والرّعايا، وطبعا نساء علِْية القوم،
فتزوجت نساء الأُمراء والكبراء برجال أقل منهن منزلة ومكانة،
فكانت السّطوة والكلمة العُليا للنساء واستمر الحال لحد النهاردة سبحان الله وده ظاهر في كتير من الأحداث في واقع البيوت المصرية 😅
عرفتم السبب ليه كتير من النساء المصريات مختلفات عن غيرهم من باقي النساء من البلدان التانية 😁
وشوفنا إزاي بعد كل المعجزات إللي حصلت أمام بني إسرائيل دي وشافوها بنفسهم وشافوا إزاي في النهاية ربنا نجاهم بشكل مذهل ومُعجز وأهلك فرعون وآل فرعون قصاد عينيهم؛
أول ما شافوا ناس بيعبدوا أصنام قالوا لموسى عليه السلام : احنا كمان عايزين إله نعبده قدامنا كده زي ما الناس دي عندهم إله😑
طبعا موسى عليه السلام اتصدم😳
بعد كل ده جايين تقولوا عايزين إله!
أومال مين إللي نجاكم من فرعون؟!!
ومين إللي كان بينزل المعجزات دي كلها قدام عنيكم😳
يعني إيه إله أصلا من وجهة نظركم؟!
هو إيه معنى العبودية عندكم🤦♂️
انتم جهلة جهل شديد، لأ وكمان ده أشد أنواع الجهل والعياذ بالله فعلا😑
"قَالَ إِنَّكُمْ قَوْمٌ تَجْهَلُونَ "
بني إسرائيل كانوا عايشين في مصر بقالهم حوالي ٤٠٠ سنة تحت استعباد الفراعنة لهم،
ومن كتر ما اتعودوا إنهم يشوفوا أهل مصر بيعبدوا الأصنام، وكمان فرعون كان مُدّعي الربوبية والألوهية، فطبيعي جدا إن موضوع الإله المادي إللي بيكون قدّامهم متجَسّد ده يبقى حاجة عادية بالنسبة لهم وشيء ميقدروش يستغنوا عنه عشان يؤمنوا بيه من وجهة نظرهم🤷♂️
☆وده اسمه إِلْف المعصية أو إِلف الخطأ...
يعني من كتر ما بنشوف الخطأ أو المعاصي ومفيش في المقابل حتى إنكار ورفض للخطأ ده بالقلب؛ فاحنا اتعودنا عليها وبقت بالنسبة لنا عادي😕
والموضوع بيتطور بعد كده وبيوصل إن لما حد بينكر الخطأ بنستغرب كلامه وبنحسه جاي من كوكب آخر 🤨
وأقرب مثال على الموضوع ده ...تهنئة غير المسلمين بأعيادهم👌
لما نقول للناس ده ماينفعش، يقولوا لك وإيه المشكلة!
بطلوا تطرف وتشدد😶
طب الوضع ده وصل لكده إزاي؟
بسبب إن الناس خلاص اتعودوا سنين إنهم يهنوا غير المسلمين بعيدهم بحكم الجيرة والصحوبية ودعوات التعايش والانصهار مع الشرائع التانية، فبقوا شايفين ده عادي.
فطبيعي لما نيجي نقول مينفعش يا جماعة، هيعترضوا 🤷♂️
وهو ده إللي حصل مع بني إسرائيل، هم مش فاهمين إيه طبيعة الإله إللي أَرسل موسى عليه السلام،
همّ أه على دين يعقوب ويوسف عليهما السلام لكن مفيش علم...مفيش عقيدة... مفيش أسماء وصفات...
مش عارفين إن الإله لازم يكون قوي متين واحد أحد خالق كل شيء لم يَلد ولم يُولد وملوش شبيه ولا مَثِيل،
لا ينام ولا يأكل ولا يتزوج ولا يحتاج لأحد من خلقه لكن بالعكس كل خلقه فقراء إليه فبيتوجهوا له بالدعاء والعبادة، فهمّ لو عارفين الكلام ده كان مستحيل ييجي في بالهم إن حتة بقرة من الطين أو حقيقية حتى هي إللي مفروض يعبدوها مع إنها مخلوق زيها زيهم بل هم كبني آدم أكرم وأعقل منها👌
وانتم شايفين إزاي مسلمين كتير دلوقتي للأسف مسلمين بالاسم بس،
ميعرفوش حاجة عن ربنا ولا عن صفاته ولا...ولا...
علم العقيدة ده أول حاجة كانت الرسل بتعلمه لأقوامهم👌
"وَلَقَدْ بَعَثْنَا فِي كُلِّ أُمَّةٍ رَّسُولًا أَنِ اعْبُدُوا اللَّهَ وَاجْتَنِبُوا الطَّاغُوتَ "
"وَمَا أَرْسَلْنَا مِن قَبْلِكَ مِن رَّسُولٍ إِلَّا نُوحِي إِلَيْهِ أَنَّهُ لَا إِلَٰهَ إِلَّا أَنَا فَاعْبُدُونِ"
فبني إسرائيل في الوقت ده كانوا زي المسلمين إللي من النوعية دي، مفيش علم بالخالق الرب المعبود المستحق للعبادة ولا بصفاته ولا بأسمائه ولا بأفعاله ولا بمُرادِه منّا على وجه التحديد👌
☆أنا بحاول أقرب لكم الصورة على أد ما اقدر عشان هتلاقوا إللي بني إسرائيل عملوه مع موسى عليه السلام بيحصل من ناس حوالينا كتير في زماننا ده،
وربنا بيحكي لنا قصتهم في القرآن كتير جدا عشان التشابه إللي بيننا وبينهم عشان نتعظ ومنعملش زيهم،
وخدوا بالكم إن إللي مش هيتعظ وياخد باله ربنا هيستبدل بيه إللي أحسن منه👌
"وَإِن تَتَوَلَّوْا يَسْتَبْدِلْ قَوْمًا غَيْرَكُمْ ثُمَّ لَا يَكُونُوا أَمْثَالَكُم"
موسى عليه السلام بقى قالهم إنتم بتعبدوا الله خالق السماوات والأرض إللي شفتوا معجزاته بسمعكم وأبصاركم..
والناس إللي بتعبد الأصنام دي ربنا هيِنسف إللي بيعبدوه ده، وأصلا عبادتهم دي للشيطان مش لله😡
"إِنَّ هَـؤُلاء مُتَبَّرٌ مَّا هُمْ فِيهِ وَبَاطِلٌ مَّا كَانُواْ يَعْمَلُونَ"
فسكتوا ومتكلموش لأن موسى عليه السلام كان شديد فكانوا بيخافوا من غضبه وبيعملوا له حساب 😅
بعكس هارون عليه السلام كانوا بيحبوه وكان هَيِّن لَيِّن معاهم، فهمّ سكتوا لكن الموضوع لسه جواهم😑
دلوقتي بني إسرائيل خرجوا من مصر ..هيقعدوا فين؟ ولا هيمشّوا أمورهم إزاي😕
لازم مكان ولازم قانون ودستور يمشوا عليه لأنهم يُعتَبَروا دولة ناشئة،
فربنا أمر موسى عليه السلام إنه يتوجه مع بني إسرائيل للأرض المقدسة إللي هي كانت وطنهم من عهد يعقوب عليه السلام عند بيت المقدس،
وهم في الطريق عطشوا ..فربنا أوحى لموسى عليه السلام إنه يضرب الحجر بالعصا بتاعته ...
فضرب موسى الحجر بالعصا فانفجر من الصخر اثنتا عشرة عيناً من الماء..
بعدد قبائل بني إسرائيل، كل قبيلة ليها عين يشربوا منها.
☆شايفين العصا ودورها سبحان الله👌
ربنا أمر موسى عليه السلام في الأول إنه يرميها مع إنها كانت عزيزة عليه... فلما سابها لله ربنا جعلها سبب لكل المعجزات بعد كده 😊
قال النبي ﷺ :
"إِنَّكَ لَنْ تَدَعَ شَيْئًا للهِ إلاَّ أَبْدَلَكَ اللهُ بِهِ مَا هُوَ خَيْرٌ لَكَ مِنْهُ"
يعني من ترك شيئا لله عوضه وأبدله الله خيرا منه 👌
ربنا أمر موسى عليه السلام إنه يروح جبل الطور عشان يعرف المنهج إللي هتقوم عليه الدولة والقوانين بتاعتهم، والحلال والحرام.. يعني زي إللي عندنا في القرآن كده،
"وَوَاعَدْنَا مُوسَى ثَلاَثِينَ لَيْلَةً وَأَتْمَمْنَاهَا بِعَشْرٍ فَتَمَّ مِيقَاتُ رَبِّهِ أَرْبَعِينَ لَيْلَةً"
فموسى عليه السلام ترك بني إسرائيل مع هارون عليه السلام خليفة له، يراعي أمور بني إسرائيل لحد ما يرجع من عند جبل الطور..
"وَقَالَ مُوسَى لأَخِيهِ هَارُونَ اخْلُفْنِي فِي قَوْمِي وَأَصْلِحْ وَلاَ تَتَّبِعْ سَبِيلَ الْمُفْسِدِينَ"
وربنا كان أمر موسى عليه السلام بالصيام .. وكان الوقت المحدد إللي هيقعده موسى بعيد عن بني إسرائيل وإللي هيتعبد فيه لربنا عند الطور ويتلقّى فيه الألواح ثلاثين ليلة، بعد الثلاثين يوم ما عدت موسى عليه السلام فطر بعد الصيام،
فربنا سأل موسى ليه أفطرت ؟
طبعا هو ربنا يعلم السبب عز وجل لكنه بيسأله عشان يعلمه👌
فقال موسى عليه السلام عشان رائحة الفم اتغيرت،
فربنا قاله: إنت متعرفش إن ريحة فم الصائم عندي أفضل من رائحة المسك؟
وأمره عز وجل إنه يصوم عشر أيام كمان، فتمت المدة كلها ٤٠ ليلة.. وده فضل واحد فقط من فضائل الصيام عند الله عز وجل😊
خلال الأربعين يوم دول كان ربنا بيتكلم مع موسى عليه السلام لكن من غير ما يراه رأي العين، فهو النبي الوحيد إللي ربنا كلمه وهو على الأرض،
بعكس رسول الله ﷺ إللي ربنا كلمه في رحلة المعراج في السماء،
عشان كده موسى عليه السلام اسمه كليمُ الله😁
فموسى عليه السلام من كتر ما اتكلم مع ربنا اشتاق إنه يراه وأكيد انتم متخيلين إحساسه🙊
فنادى ربنا وطلب منه إنه يراه، فربنا قال له:
مش هتقدر تشوفني دلوقتي لأني لم أعطِ البشر في الدنيا الطاقة والقدرة الجُسمانية والحسية الكافية إللي تتحمل رؤيتي ويقدروا يشوفوني بيها،
"وَلَمَّا جَاءَ مُوسَى لِمِيقَاتِنَا وَكَلَّمَهُ رَبُّهُ قَالَ رَبِّ أَرِنِي أَنْظُرْ إِلَيْكَ قَالَ لَنْ تَرَانِي"
☆في الآخرة لما المؤمنين هيدخلوا الجنة هيكون لهم قوة وخصائص مختلفة هتخليهم يقدروا بيها يشوفوا ربنا عز وجل وده هيكون أعظم نعيم بالنسبة لهم هيكونوا أخدوه في الجنة👌
والكفرة وغيرهم من إللي ربنا أراد عقابهم هيكونوا محجوبين عن رؤيته والعياذ بالله..
" إِنَّهُمْ عَن رَّبِّهِمْ يَوْمَئِذٍ لَّمَحْجُوبُونَ"
يعني مش ربنا هو المحجوب عنهم، لأ طبعا حاش لله، ربنا لا يحجبه الله شيء، لكن همّ إللي هيكونوا ممنوعين من رؤيته كعقوبة لهم،
وأي عقوبة أشد من الحرمان من رؤية خالقك إللي سواك بيديه ومتصف بصفات الكمال والجمال والجلال اللي مالهاش مثيل؟!👌
في ناس بقى بتُنكر رؤية ربنا في الجنة، وبيقولوا إزاي يعني هنشوفه وربنا قال لا تدركه الأبصار،
ثم ليس كمثله شيء، إنتم لو قلتم إننا هنشوفه يبقى كده بتشبّهوه بالمخلوقات في إنه له حدود زيهم وحجم وشكل!😑
بكل بساطة في حاجة اسمها الإحاطة والإدراك التام، وفي حاجة اسمها الرؤية والإِبصار،
هقرب لكم الموضوع، مش إحنا بنشوف السماء😁
طيب هل احنا نقدر نُحيط بالسماء كلها من مصر لحد القطب الجنوبي شمالا وجنوبا؟
يعني نقدر نشوف كل السماء بعنينا؟...لأ طبعا..!
ولله المثل الأعلى، احنا هنشوف ربنا زي ما بنشوف السماء بكل وضوح، بدون إحاطة تامة لجلاله عز وجل👌
وهنشوفه حقيقةً مش مجازًا ولا هيتهيأ لنا ده مثلا،
زي كده لما بنشوف القمر في ليلة البدر بشكل حقيقي واضح بدون تخيلات أو أوهام أو تهيّؤَات..
وشوفوا رسول الله ﷺ بيقول إيه لما نظر للقمر ذات ليلة، قال:
"أَمَا إِنَّكُمْ سَتَرَوْنَ رَبَّكُمْ 《كَمَا》 تَرَوْنَ هَذَا، لاَ تُضَامُّونَ - أَوْ لاَ تُضَاهُونَ - فِي رُؤْيَتِهِ"
يعني انتم هتشوفوا ربكم في الجنة زي مانتم شايفين القمر ده كده بدون تزاحم عليه و بدون ظُلم للبعض بإن شوية منهم يتمكنوا من إنهم يشوفوه وشوية لأ.. وده معنى كلمة
"لا تُضامُّون"
فهنا التشبيه عبارة عن تشبيه "رؤية" بـ "رؤية"، مش تشبيه لله بالقمر نفسه حاشاه فهو ليس كمثله شيء👌
وعارفين كمان🤭
من أسباب الفوز برؤية ربنا في الجنة إن شاء الله يوم القيامة هو المحافظة المستمرة على صلاتين اتنين مهمين جدا👌
صلاة الفجر وصلاة العصر،
فباقي الحديث إللي قلناه من شوية إن رسول الله ﷺ بيقول:
"فَإِنِ اسْتَطَعْتُمْ أَنْ لاَ تُغْلَبُوا عَلَى صَلاَةٍ قَبْلَ طُلُوعِ الشَّمْسِ وَقَبْلَ غُرُوبِهَا، فَافْعَلُوا"
ربنا يرزقنا وإياكم لذة النظر إلى وجهه الكريم🤲
المهم،
ربنا قال لموسى إنه مش هيقدر على رؤيته عز وجل في الدنيا،
وخلّاه يشوف مثال قصاده على كده، قال له الله: انظر للجبل.. أنا هتجلّي للجبل،
"وَلَـكِنِ انظُرْ إِلَى الْجَبَلِ فَإِنِ اسْتَقَرَّ مَكَانَهُ فَسَوْفَ تَرَانِي"
وشوف بنفسك إيه إللي هيحصل للجبل في ساعتها مباشرة،
فلما تجلّى ربنا عز وجل بجلاله وعظمته للجبل،
الجبل الشامخ العالي القوي جدا ده اندك في الأرض وبقى شوية تراب متبعتر قدامه في لحظة👌
يعني ربنا رفع الحجاب عن مِثل الخُنْصُر فالجبل مستحملش فانهد في لحظة،
يعني عارفين صابع اليد الصغير بتاعنا ده🤔
أهه ربنا رفع الحجاب عنه بحجم الصابع الصغير كده،
لحظة من الجلال فوق الاحتمال لدرجة إن موسى عليه السلام لم يتحمل الصدمة وأُغمَي عليه،
"فَلَمَّا تَجَلَّى رَبُّهُ لِلْجَبَلِ جَعَلَهُ دَكًّا وَخَرَّ موسَى صَعِقًا"
لما موسى أفاق من الإغماء نادى ربنا وقال له: ياربي أنا اتعلمت خلاص، مش هطلب رؤيتك في الدنيا تاني، آمنت بيك وبجلالك وعظمتك وكبريائك، تباركت ربنا وتعاليت وعز ثناؤك وتقدست صفاتك وأسماؤك.
"فَلَمَّا أَفَاقَ قَالَ سُبْحَانَكَ تُبْتُ إِلَيْكَ وَأَنَاْ أَوَّلُ الْمُؤْمِنِينَ"
قام موسى، وأخد الألواح ولسه هيرجع لقومه، ربنا قال له على حاجة حصلت مع بني إسرائيل خلال فترة غيابه عنهم،
"قَالَ فَإِنَّا قَدْ فَتَنَّا قَوْمَكَ مِن بَعْدِكَ وَأَضَلَّهُمُ السَّامِرِيُّ"
بني إسرائيل عبدوا العجل من دون الله 😶
سبحان الله!
إللي في دمهم في دمهم😑
يعني كلام موسى عليه السلام معاهم مجبش نتيجة وكانوا مستنيينه يغيب عنهم عشان يعبدوا إله تاني🤦♂️
إيه إللي حصل مع بني إسرائيل وإيه حكاية العجل دي🤨
لما ربنا أمر موسى عليه السلام إنه ياخد بني إسرائيل ويخرجوا من مصر كان معاهم دهب مستلفينه من أهل مصر،
فلما عبروا البحر وعدّوا بسلام، حسوا بحرج إن الدهب يفضل معاهم، فرموه..
كان في واحد اسمه السامري قِيل إنه كان من أهل مصر مش من بني إسرائيل وخرج مع بني إسرائيل لما خرجوا من مصر وقيل إنه من بني إسرائيل،
المهم هو أخذ الذهب ده وسيّحه ونَحت منه تمثال على شكل عجل أعزكم الله،
وكان شاف أثر فرس جبريل عليه السلام لما كان بيمشي على الأرض، وكان أثر فرسه مختلف ومميز وملفت للي يشوفه على الأرض،
فأخد قبضة من التراب إللي مشي عليه الفرس ده وخباها عنده..
بعد ما صنع العجل🐃 جاب التراب بتاع أثر فرس جبريل عليه السلام ورماه على العجل فبقى بيطلع صوت بقدرة ربنا،
وربنا جعل للعجل صوت لأنه أراد إنه يختبر بني إسرائيل إللي لسه في قلوبهم مرض و عايزين يعبدوا إله محسوس يشوفوه،
فجعل العجل له خُوار يعني له صوت عن طريق التراب إللي ألقاه السامري على العجل عشان يفتنهم ويطلع إللي في قلوبهم، لأن ربنا بيحاسب على الأفعال مش على إللي بيكون في النفوس💁♂️
وربنا استعمل في الفتنة والبلاء ده السامري إللي كان أصلا إنسان نيته سيئة هو كمان، فهيبقى ابتلاء للكل👌
☆طبعا في أقوال تانية عن صناعة العجل وإزاي بقى له صوت، لكن القول إللي قلته ده هو أشهر الأقوال عند المفسرين وحتى أقربها للمنطق😅
في نفس الوقت ده كان بنو إسرائيل زهقوا ..
عمالين يقولوا فين موسى ..فين موسى..
عايزين نعبد ربنا ..هو فين ربنا😕
راح السامري لبني إسرائيل وقال لهم إن العجل ده إله موسى،
وموسى ضاع أصلا، عدى التلاتين يوم إللي هو كان قايل لكم عليهم ومجاش، راح يقابل ربه ونسي إن ربه موجود هنا💁♂️
فبني إسرائيل بدأوا يقتنعوا بكلام السامري😬
المفروض بالعقل يعني يشوفوا إنه لا بيتحرك ولا بيرد عليهم ولا يملك أي ضر أو نفع، فإزاي يكون إله أو كائن حي أصلا 🙄
"وَلَقَدْ قَالَ لَهُمْ هَارُونُ مِن قَبْلُ يَا قَوْمِ إِنَّمَا فُتِنتُم بِهِ وَإِنَّ رَبَّكُمُ الرَّحْمَنُ فَاتَّبِعُونِي وَأَطِيعُوا أَمْرِي "
يعني حتى هارون عليه السلام كان معاهم وقال لهم ده مش إله،
ده السامري فتنكم بيه بسبب شكله إللي من الدهب وصوته اللي بيطلع منه ده.. ربكم هو الله الواحد الأحد اسمعوا كلامي أنا وموسى مش السامري😥
فقالوا لهارون عليه السلام: احنا هنفضل نعبده لحد ما موسى يرجع😤
"قَالُوا لَن نَّبْرَحَ عَلَيْهِ عَاكِفِينَ حَتَّىٰ يَرْجِعَ إِلَيْنَا مُوسَىٰ"
هارون عليه السلام خاف لو شدّ عليهم ونهاهم وعمل معاهم مشكلة إنهم يتفرقوا ويبعدوا عن المكان وييجي موسى عليه السلام يلاقيهم مش موجودين😑
في الوقت ده كان ربنا أخبر موسى عليه السلام بالحوار إللي حصل ده،
فأخد موسى عليه السلام الألواح إللي كتب فيها أوامر ربنا والمنهج إللي هيمشوا عليه وهي زي الأوراق كده إللي بنكتب فيها يعني😅
ورجع لقومه وهو غضبان غضب شديد جدا، أول ما وصل شاف المنظر والناس بتعبد العجل😱
فمن شدة غضبه لله وإن قومه استبدلوا عبوديتهم لله رب العالمين بعبودية عجل
قام رامى الألواح إللي كان فيها كلام ربنا😶
يعني زي ما الواحد ممكن يرمي المصحف من إيده كده لا سمح الله لو فجأة حس بزلزال أو البيت ولع ربنا يحفظنا 😅
طبعا ليس الخبر كالمعاينة، يعني لما احكيلك عن حاجة غير لما تشوفها بعينك😶
فالْتَفت، فشاف هارون عليه السلام راح جارّه من راسه ومن لحيته بقوته إللي احنا عارفينها من أول قصته لما زق واحد وقتله،
"وَأَلْقَى الألْوَاحَ وَأَخَذَ بِرَأْسِ أَخِيهِ يَجُرُّهُ إِلَيْهِ"
متخيلين المنظر🙊...متخيلين شدة الغضب إللي كان فيها موسى عليه السلام من غيرته على دين ربنا،
رمى الألواح إللي هي الوحي من الله وتعدى على نبي، وكل ده وهو مش حاسس بنفسه،
وسأل هارون عليه السلام بغضب: ياهارون إنت شفتهم ضلوا ..ليه سيبتهم يعبدوا العجل.. انت بتعصي كلامي😡
"قَالَ يَا هَارُونُ مَا مَنَعَكَ إِذْ رَأَيْتَهُمْ ضَلُّوا أَلَّا تَتَّبِعَنِ أَفَعَصَيْتَ أَمْرِي"
☆موسى عليه السلام كان خايف ليكون هارون عليه السلام قصّر في نهيهم عن عبادة العجل فعشان كده ألقى عليه اللوم، لأن أهل العلم لما يشوفوا مخالفة لأوامر الله بيتهموا أنفسهم وأتباعهم وأهلهم بالتقصير قبل ما يلقوا اللوم على الناس،
وهارون كان أمنية موسى من ربنا لما طلب منه يرزقه بشخص يكون وزير له عشان يساعده في هداية بني إسرائيل، عشان كده رد فعل موسى عليه السلام معاه كان شديد👌
فهارون عليه السلام بدأ يدافع عن نفسه وقال له وهو بيهدّيه :
"قَالَ ابْنَ أُمَّ إِنَّ الْقَوْمَ اسْتَضْعَفُونِي وَكَادُواْ يَقْتُلُونَنِي.. فلا تُشمِتْ بيِ الأعداءَ ولا تجعلني مع القوم الظالمين"
يعني يا ابن أمي أنا نصحتهم طبعا، لكنهم استضعفوني وكانوا هيقتلوني،
وخفت يفترقوا عن المكان إللي احنا متفقين عليه ده وتيجي تقول لي إنت فرّقت بني إسرائيل في الأرض وكان مفروض تستناني لحد ما أرجع😥
فبلاش تعمل كده فيّ قدامهم وتخليهم يتأكدوا أكتر إني كنت غلطان وإنك بتعاقبني، ومتحطنيش في كفة واحدة مع الظالمين😔
فلما شاف موسى عليه السلام إن هارون فعلا عمل إللي عليه ومقصّرش، دعا ربنا إنه يغفر له ويغفر لأخوه هارون ويتغمدهم برحمته،
"قَالَ رَبِّ اغْفِرْ لِي وَلِأَخِي وَأَدْخِلْنَا فِي رَحْمَتِكَ ۖ وَأَنتَ أَرْحَمُ الرَّاحِمِينَ"
بني إسرائيل خايفين من موسى دلوقتي وهمّ شايفين غضبه وشافوا الأَخّين اتصافوا واجتمعوا من تاني عليهم سوا🙊
فعرفوا إنهم في مشكلة..
سألهم طبعا بكل غضب: إيه إللي خلاكم تعبدوا العجل 😠
"هو ده تنفيذ الوصية إللي وصتكم بيها قبل ما أمشي 😡
وَلَمَّا رَجَعَ مُوسَى إِلَى قَوْمِهِ غَضْبَانَ أَسِفًا قَالَ بِئْسَمَا خَلَفْتُمُونِي مِن بَعْدِيَ أَعَجِلْتُمْ أَمْرَ رَبِّكُمْ"
فقال له بنو إسرائيل:
هو إحنا مأخلفناش وصيتك بمزاجنا ده السامري هو إللي عمل العجل من الذهب إللي رميناه، وهو إللي أقنعنا بعبادة العجل😐
"قَالُوا مَا أَخْلَفْنَا مَوْعِدَكَ بِمَلْكِنَا وَلَكِنَّا حُمِّلْنَا أَوْزَارًا مِّن زِينَةِ الْقَوْمِ فَقَذَفْنَاهَا فَكَذَلِكَ أَلْقَى السَّامِرِيُّ"
راح موسى سأل السامري: إنت إيه حكايتك😡
"قَالَ فَمَا خَطْبُكَ يَا سَامِرِيُّ"
فحكى له قصة إنه شاف أثر جبريل وعمل العجل، وإن نفسه هي إللي سوّلت وزيّنت له إنه يعمل كده😓
فموسى بلّغه بوقوع عقاب إلهي شديد جدا عليه بسبب إللي عمله ده،
قال له موسى: اذهب... بسبب إللي انت عملته ده ربنا هيبتليك بمرض إن أي حد يلمسك تحس بألم شديد جدا
وهتفضل تصرخ بفزع لأي حد يقرب منك :
"ما تلمسنييييش... ما تلمسنييييش"
ومش هتستحمل تكون بين الناس وهتكون وحيد في حياتك لحد ماتموت،
"قَالَ فَاذْهَبْ فَإِنَّ لَكَ فِي الْحَيَاةِ أَن تَقُولَ لَا مِسَاسَ وَإِنَّ لَكَ مَوْعِدًا لَّنْ تُخْلَفَهُ"
ده غير معادك مع عذابك في الآخرة إللي مش هتهرب منه في أي حتة إن الله لا يخلف الميعاد👌
والإله المزعوم بتاعك ده هنحرقه لحد ما يسيح ويتحول لرماد وننثره في البحر ومحدش يلاقيله أثر👌
"وَانظُرْ إِلَى إِلَهِكَ الَّذِي ظَلْتَ عَلَيْهِ عَاكِفًا لَّنُحَرِّقَنَّهُ ثُمَّ لَنَنسِفَنَّهُ فِي الْيَمِّ نَسْفًا "
لما عمل كده موسى عليه السلام، أي حد كان من عُبّاد العجل تعلق الرماد على شفايفه زي علامة كده،
ورجع يعيد عليهم تاني إن رب العالمين هو الله الواحد الأحد لا شريك له ولا يُعبد إله غيره،
وقال موسى عليه السلام لقومه : إلهكم الله وحده لا شريك له العالم بكل شيء.
"إِنَّمَا إِلَٰهُكُمُ اللَّهُ الَّذِي لَا إِلَٰهَ إِلَّا هُوَ ۚ وَسِعَ كُلَّ شَيْءٍ عِلْمًا "
☆قبل ما نكمل قصتنا، فيه معلومة لازم نعرفها، وهي إن السامري ده مش هو المسيح الدجال👌
السامري مات من عهد موسى عليه السلام، والمسيح الدجال له قصة تانية خالص وصفات تانية خالص،
وفي الحديث:"إن الله لم يبعث نبيا إلا حذر أمته من الدجال"
فلو كان السامري هو الدجال كان موسى عليه السلام عرفه وكان حذر الناس منه،
ومحدش قال قبل كده إن السامري هو المسيح الدجال غير واحد من العصر الحديث،
قال إنه موجود في مثلث برمودا ومجبش دليل على كلامه، والكلام ده –غير إن مفيش عليه دليل علمي أو شرعي أو غيره-
فهو غير صحيح لأن رسول الله ﷺ قال : "يخرج الدجال من أرض بالمشرق يقال لها خُرَاسَان"
فالسامري مش هو المسيح الدجال😊
نرجع لبني إسرائيل بقى ونشوف عملوا إيه،
فلما عرف بنو إسرائيل خطأهم تابوا، ولكن الله لم يقبل توبتهم إلا بكفّارة "القتل"👌
يعني كل واحد يقتل التاني🙊
اختبار صعب فعلا!
فأمر الله بني إسرائيل أن يتقاتلوا فيما بينهم، ففعلا بدأوا يقتلوا بعض لحد ما وصل عدد إللي ماتوا في بعض الأقوال لسبعين ألف😮
وبكى النساء والأطفال وقالوا لموسى عليه السلام إنه يدعي ربنا يخفف عنهم، فدعا موسى الله فأمرهم إنهم يوقفوا القتل، وحزن موسى عليه السلام للمقتلة دي،
فربنا أوحى له: ليه الحزن..من قُتل فهو شهيد حي عندي يُرزق، ومَن تبقى كفّرت عنه ذنوبه، فاستبشر موسى عليه السلام وبشّر بني إسرائيل،
وده اللي القرآن حكى لنا عنه في سورة البقرة:
"وَإِذْ قَالَ مُوسَى لِقَوْمِهِ يَا قَوْمِ إِنَّكُمْ ظَلَمْتُمْ أَنفُسَكُمْ بِاتِّخَاذِكُمُ الْعِجْلَ فَتُوبُواْ إِلَى بَارِئِكُمْ فَاقْتُلُواْ أَنفُسَكُمْ ذَلِكُمْ خَيْرٌ لَّكُمْ عِندَ بَارِئِكُمْ فَتَابَ عَلَيْكُمْ."
بعد المقتلة دي اختار موسى عليه السلام سبعين رجل عشان يروحوا مع موسى عليه السلام عشان يعتذروا عن قومهم لما عبدوا العجل،
فأمرهم موسى عليه السلام بإنهم يصوموا ويتطهروا ويطهّروا هدومهم عشان يستعدوا للقاء المهيب ده،
فلما ذهبوا مع موسى عليه السلام عند جبل الطور وسمعوا كلام الله لموسى قالوا:
ماشي احنا مش هنعبد العجل لكن برده مش هنؤمن بإلهك لحد ما نشوفه بعنينا😤
"وَإِذْ قُلْتُمْ يَا مُوسَى لَن نُّؤْمِنَ لَكَ حَتَّى نَرَى اللَّهَ جَهْرَةً "
☆ بجد كده كتير🤦♂️
ليه حق موسى عليه السلام يكون من أولي العزم😑
يعني الواحد كان مُشفق عليهم من المقتلة ومن وجوب إن يكون في كفّارة لقبول توبتهم بالشكل الصعب ده،
لكن كده الواحد فعلا عرف ليه ربنا عز وجل عمل معاهم كده،
بيأدبهم سبحانه،
وهو أعلم بأمراض قلوبهم وقسوتها فعلا زي ما حكى عنها إنها كالحجارة أو أشد قسوة👌
لأ والمفروض إن دول كمان أفضل ناس في بني إسرائيل، يعني من الصّفوة المُختارة بعناية من موسى😳
أمّال الباقيين عاملين إزاي😱
المهم بعد ما قالوا الكلمتين دول صُعقوا فماتوا👌
"فَأَخَذَتْكُمُ الصَّاعِقَةُ وَأَنتُمْ تَنظُرُونَ"
ياترى هيكون إيه رد فعل بني إسرائيل لما يعرفوا إن أحسن ناس فيهم ماتوا كلهم؟
تعليقات
إرسال تعليق
اذا اعجبك الموضوع او لديك اى سؤال برجاء تركه فى التعليقات وسيتم الرد عليك ..